日本百名城一百之十四 055 千早城

造訪日期：2018.07.30

點去：南海電鐵高野線、近鐵長野線河內長野站，或近鐵長野線富田林站，轉乘前往「金剛山ロープウェイ前」（即金剛山纜車站），於「金剛登山口」站落車，對面馬路不遠處為登山樓梯，至千早神社需時約二十分鐘。

入場費：無

本人吸印位置：豆品店「金剛山麓まつまさ」

千早赤阪村網站分頁：http://www.chihayaakasaka.org/tourism/j_castle.html

講咗十三個城，除咗史前嘅吉野之里之外，全部都係安土桃山、江戶兩時代嘅產物。千早城就係少數鎌倉、室町時期嘅要塞。當時嘅城，已經超越咗中世嘅「集落」（百名城有宮城嘅多賀城），而進化成有「曲輪」呢樣嘢（即係分層，本丸、二之丸、三之丸等等），千早城亦係有去到四之丸加一個出丸共五個曲輪，加上係山城，易守難攻。戰國早期嘅城（百名城有高取、吉田群山、小谷等等）都是如此依山設計。至於一路我都以為係戰國已經開始蓬勃嘅天守，去完東北嘅根城後有所疑惑，今日執筆時查資料亦證實，天守呢樣嘢，雖然各地都開始有將「櫓」，即係城樓規模化，但真正叫到「天守」係由足利義昭時期已經開始，即係戰國嘅尾聲，日本人由源平爭霸起，經歷元弘、南北朝、應仁咁多代嘅戰亂，打咗咁耐仗，原來同普通人所想唔同，「城」係無「天守」呢個概念。

咁千早城起得咁防守城為咩呢？呢段歷史我仲係研究中唔熟，但大概係，當年後醍醐天皇要推翻鎌倉幕府，其中一個後世鼎鼎大名，響應嘅朋友叫楠木正成，咁原本都係劣勢眼見幕府軍都要嬴時，楠木正成靠守住千早城及附近嘅上赤坂、下赤坂城，成功以一千軍殺退幕府二萬五人，亦鼓勵咗全國倒幕，包括關東直接將幕府「執權」北條氏了結嘅新田義貞。（另一要員足利尊氏做咗將軍，殺晒楠木、新田，再眨堆後醍醐天皇去吉野，乃後話。）

千早城響守備最優勢之處就係依金剛山而見。如果淨係造訪千早城唔登金剛山就有啲可惜。而且有纜車，可以去到淨返一百米處輕登山（當然去完千早城再行成千級樓梯上山都係一個選擇），落山時繞經千早城亦屬唔錯。所以舊年七月尾熱死加時間都差唔多十二點，我係咁樣落山法，但因為主要介紹千早城，所以我會將順序調轉。

如果淨係上金剛山，另一邊吸名城印嘅豆品餐廳暨商店「金剛山麓まつまさ (Matsumasa)」隔離就係登山道，其實係徒體力，沿路係整備好晒全部十分好行嘅梯級，只要係有力水，登山無難度。至於我吸印，就係落山繞道過去。另外間舖仲有千早神社嘅朱印，但當時我無開始儲要貼嘅，所以作罷，下次登山補購。

OLYMPUS DIGITAL CAMERA — 當日事前買咗麵包飯團上山食，落山只感疲累所以食個出名嘅米布丁同要杯凍啡，反而無食豆製品。

鏡頭返返去登山口。如果要上山我諗真係都幾費力，我落都落咗十分鐘，上應該要二十分鐘了。去到四之丸，應該係成個城最廣闊嘅曲輪，而家有座應該不定期開放嘅千早茶屋（我諗直頭係唔開）。

繼續到三之丸可以見到一個石標誌，再上去就係千早神社。而我逆行時，就由山上去到楠公個仔個墓，之後有個牌寫住「千早城跡」，不過去到三之丸匯合點條路局部有啲險阻，而且同金剛登山道唔同，一個平日真係無人好似呢個香港人痴咗線去千早城，所以離開咗主幹道嘅登山道後都有驚驚地。千早神社則位於二之丸，當然呢啲地方好難有神職人員（之後上吉野奧千本金峯神社反而有，估佢唔到）。