造訪日期：2018.07.16
點去：JR 琵琶湖線、近江鐵道，彥根站，步行約15分鐘或轉乘市內路線巴士
入場費：天守有，連玄宮園、博物館有折扣通票
本人吸印位置：彥根市開國紀念館 (不用入場費)
官方網站：http://www.hikoneshi.com/jp/castle/
彥根城同姬路城一樣，係現存十二天守中嘅國寶五城之一，但佢嘅歷史係由江戶初期開始。當時井伊直政於關原後，被封響石田三成嘅佐和山城，雖然有遷城計劃但因為傷患佢兩年後就瓜咗老襯。個仔直勝仲細，咁井伊家嘅家老木俁守勝就繼續呢個任務，但係唔係原本計劃嘅磯山而係呢個「彥根山」。之後直勝俾細佬直孝俾下去，直勝呢一支井伊家就轉咗去上野（古國名，同現今東京上野無關），一直傳落去同轉封，最後廢藩置縣時位於越後與坂一帶，而直孝一支則響幕府扮演重要角色，產多名大老，但最出名莫過於幕末因對反對勢力太強權而俾人隊冧嘅井伊直弼。到明治時代，彥根都差啲要同其他城一樣被解體，但明治天皇嚟到時，當時仲未係首相嘅大隈重信係咁遊說佢到佢心軟先逃過廢城命運，變成皇室所有再交返俾井伊家；五十年後，井伊家再將彥根城送交彥根市政府。所以而家嘅彥根城大致都維持原貌。
首先可以去官網睇睇個地圖：
彥根城離車站話遠唔遠，話近都唔算，行十五分鐘左右就到。如果真係攰，市內嘅各線巴士或者幫到你，但唔好望佢哋班次頻密。所以我兩次去都係用行嘅。如果由車站去基本上都係用護國神社旁嘅「佐和口」登城。一入佐和口右手邊即刻係「開國紀念館」，先入去吸印先。
另一邊有佐和口多聞櫓（無相），同埋另一重要文物：「馬屋」，話個馬屋係全國特有仲喺城入面存在嘅馬屋。
喺馬屋你可以選擇向左定向右走。想快啲上天守，或者參觀博物館，就請向左。右邊則先參觀庭園「玄宮園」。天守、玄官園、博物館都要另繳入場費，但有一張共通票可以折扣使用。敘事關係，先講玄宮園。
玄宮園唔算係一個好大，亦除咗呢邊（東入口）呢張相呢個景之外，景色唔算係一流。但庭園再早見於 1678 有整備嘅紀錄，所以都有啲歷史價值。另外仲有一個「樂樂園」，原為大名嘅「下屋敷」，下屋敷有啲藩作用主要係儲物，而彥根則用為大名嘅遊樂空間。井伊直弼誕生地，亦位於樂樂園。
江戶時彥根城有三個大門，「大手門」、「表御門」以及「黑御門」，三者現今都已經唔存在，但其後嘅山道仍以其命名。如果由玄宮園登城，就會經過「黑門山道」或「山崎山道」，但一般第一次嚟彥根會先造訪博物館，再經「表門山道」上山。博物館本身係表御殿，所以入面有一部份嘅作用係要嚟復元表御殿嘅風貌。另外，博物館同本丸都可以見到彥根貓（ひこにゃん）嘅蹤影。佢因為無人工（經費不足）最近半失業，不過執筆前一日佢又復出嘞，想見佢可以去佢個網站睇下佢去邊。
如果由城東一帶，先用膳後登城，就以「大手山道」上山。以表門山道同大手山道登城，條登城道不斷上坡，可以經過兩個內門，「天秤櫓」及「太鼓門櫓」，其中仲有一個「時報鐘」，同「聽鐘庵」茶房，不過一次太熱一次太匆忙都唔記得影相。
表門山道
至於由玄宮園一邊上山，則會經「黑門山道」，呢一邊會不斷上梯級，見到彥根城曼高聳嘅一部石垣。太攰嘅仲有山崎丸一邊嘅「山崎山道」，但路途比較遙遠。黑門山道上到本丸後面，而山崎山道上到山未係本丸住，你將會到達西之丸，一上到去會見到西之丸三重櫓，係彥根天守外僅存嘅三重建築。
殊途同歸，最後都係會到本丸，而當然本丸亮點係國寶．天守。十二個現存天守只有五個做到國寶（另外為姬路、松江、松本、犬山），估計主要原因係因為彥根城有個附櫓（而家作為天守入口）。天守內無展示（全部都放晒博物館），規模唔大，頂樓可以望到琵琶湖，亦屬好風景。但唯一有啲唔係好好嘅就係個影相攤位，佢好識氹你買，因為會俾張細嘅你氹你買大，結果當時的我還是買了，但都叫有個紀念價值，嘅。
總括嚟講，彥根城基本上係彥根市嘅唯一景點（當然你要搵啲無乜人去嘅一定仲有），所以彥根市平時都只有一啲觀光客，到訪人數唔算多。到訪前後可以去附近嘅「夢之橋 Castle Road」醫肚。彥根城個幅員本身都大，亦啱帶小朋友去跑跑跳跳（登閣就免），可以消耗半日時間。如果去咗好多次京阪奈有啲厭，其實可以考慮下佢哋閑靜嘅鄰居滋賀縣架。
微塵遊記 